Өзгеше оқиға, тәлкекке түскен тағдырлар, өкінішке толы өмір, жек көру мен жақсы көру – бәрі арнамыздағы «Махаббат пен Мави» атты жаңа түрік телехикаясында! Хикаядан көрермен Әли есімді кейіпкермен танысады. Әли жарқын болашақ құруды армандайтын қарапайым жігіт. Алайда қазір кісі өлтіргені үшін түрмеде жазасын өтеп отыр. Абақтыда отырған жас жігіт Мави есімді бойжеткенмен хат жазыса бастайды.Күндердің күнінде еркіндікке шыққан Әли Мавимен танысуға барып, оның ақылды, мейірімді, әділ ғана емес, ерекше сұлу қыз екенін көреді.
Тағдырдың тәлкегінен құтылған жас жігіт сүйіктісімен жаңа өмір бастап, қатардағы адамдарша өмір сүргісі келеді. Әйткенмен, тағдырдың оған қатысты өз жоспары бар екен... Жастар шаңырақ көтеруге бел буады. Алайда Әли сүйіктісінің қорқынышты құпияны жасырып жүргенін, ол ашылса, өмірі өзгеріп қана қоймай, басына қатер төнуі мүмкін екенін білмейді. Әли бір кездері Ахмед есімді жігітті өлтірді деп айыпталып түрмеге түскен еді. Ал Мави соның қарындасы болып шығады. Оның негізгі мақсаты Әлиден ағасының кегін қайтару. Алғашқы неке түнінде Мави Әлиді өлтіруге оқталады, алайда жолы болмайды.
Әли енді таңдау жасауға мәжбүр: айдай сұлу жарын полицияға ұстап бере ме, әлде некесін сақтап қалуға тырыса ма? Ол қызға «менімен бірге тұруға көнсең, түрмеге қаматпаймын» деп шарт қояды. Мавидің оған ашуы келгенмен, басқа амалы болмайды...
Біраз уақыт өткеннен кейін Мави күйеуіне ғашық болып қалғанын түсінеді. Алайда олардың арасында өшпенділіктен басқа ештеңе болмауы керек деп есептейді. Бұл оқиғаның тағы ашылмаған сыры бар. Шын мәнінде Ахмедті Әли өлтірмеген. Осыдан көп жыл бұрын ол басқа біреудің қылмысын өз мойнына алған. Сонда оны кім өлтірді?